عەبدولڕەحمان جەزائیری، سەرکردە لە چوارچێوەی هەماهەنگی، لە لێدوانێکیدا سەبارەت بە هەوڵەکانی بەرەنگاربوونەوەی گەندەڵی لە عێراق، هۆشداری دا لە بەکارهێنانی دۆسیەکانی گەندەڵی وەک کارتی فشار لە ململانێ سیاسییەکاندا و بە مەترسییەکی گەورەی بۆ سەر سەقامگیری وڵات وەسف کرد.
ئاوێنە: جەزائیری ئاماژەی بەوە کرد کە کۆتاییهێنان بە گەندەڵی و گۆڕینی ئەو سیستەمە سیاسییەی کە بە وتەی ئەو لەسەر بنەمای "گەندەڵی" دامەزراوە، ئەرکێکی زۆر قورسە. ناوبراو جەختی لەوە کردەوە کە پێویستە پرسی بەرەنگاربوونەوەی گەندەڵی لە چوارچێوەی ململانێ سیاسییەکان دەربهێنرێت و بە شێوازێکی پیشەییانە مامەڵەی لەگەڵ بکرێت، چونکە بەکارهێنانی ئەم دۆسیەیە بۆ لێدان لە رکابەرە سیاسییەکان، تەنها بارودۆخی وڵات ئاڵۆزتر دەکات.
لە کۆتاییدا، عەبدولڕەحمان جەزائیری دووپاتی کردەوە کە پێویستە پرسی گەندەڵی لە کێبڕکێ و ململانێ سیاسییەکان جیا بکرێتەوە، تاوەکو بتوانرێت دەرەنجامی ئەرێنی و کرداری بۆ شەقامی عێراقی هەبێت.