ئه‌حمه‌د شه‌رع، سه‌رۆكی سوریا رایده‌گه‌یه‌نێت، قسەكه‌ی دۆناڵد ترەمپ، سه‌رۆكی ئه‌مریكا لێكدانەوەی هەڵەی بۆ كراوە؛ ئەو باسی رۆڵی سوریای كردوە لە دۆزینەوەی چارەسەرێکی ئاشتیانە لە لوبنان.
ئاوێنه: ئەحمەد شەرع، سەرۆكی سوریا، لە چاوپێكەوتنێكی ته‌له‌فزیۆنیدا رایگه‌یاند، دۆناڵد ترەمپ نیگەرانی خۆی لە دۆخی لوبنان دەربڕیوە و دەیەوێت شەڕ لەوێ کۆتایبێت.
وتیشی، ئه‌و باسی لە رۆڵی سوریا کردوە لە دۆزینەوەی چارەسەرێکی ئاشتیانە، بەڵام لێدوانەکەی بە هەڵە لێکدرایەوە وەک ئەوەی سوریا سبەی بەیانی هێرشبکاتە سەر لوبنان.
هێمای بۆ ئه‌وه‌ش كرد، دەکرێ پشت بە سوریا ببەسترێت بۆ چارەسەری ئەرێنی بە دەستپێکردنەوەی پشتیوانییەکانی بۆ دەوڵەتی لوبنان و پتەوکردنی دامەزراوە فەرمییەکان و دامەزراندنی پەیوەندی نێوان هێزەکانی لوبنان بە حزبوڵاشەوە، چونکە چارەسەری پارچە پارچە پڕە لە کێشەی گەورە.
ئه‌وه‌شی خسته‌ڕو، ئێمە رۆژانە دەستمان بۆ لوبنان درێژ دەکەین، دۆخی سوریاش ئامرازی زۆری هەیە بۆ دروستكردنی کاریگەری ئەرێنی لەناو لوبنان.
ئه‌حمه‌د شه‌رع وتیشی، ئەمە بە پلەی یەکەم پەیوەستە بە کۆدەنگی لوبنانیەكان، سوریا ئاسایش و سەقامگیری لوبنانی بەلایەوە گرنگەو هەر ناسەقامگیرییەک لە لوبنان کاریگەری لەسەر سوریا دەبێت و بە پێچەوانەشەوە.
جه‌ختیشی كرده‌وه، من باوەڕم بە دیالۆگ هەیە چونکە هەر داخستنێكی بەو مانایە دێت کە جێگرەوەكەی شەڕە.
سه‌رۆكی سوریا وتیشی، ئێمە دەمانەوێت کێشەی حزبوڵا چارەسەر بکرێت و لوبنان بە زیندویی بمێنێتەوە، ئامادەین لەگەڵ هەمو لایەک دابنیشین.
به بڕوای ئه‌حمه‌د شه‌رع، كاتی ئەوە هاتوە ناوچەكە کۆتایی بە شەڕ و ململانێکانی خۆی بهێنێت و بەرەو گەشەپێدان و ئاوەدانکردنەوە هەنگاو بنێت.
ئه‌و قسانه‌ی سه‌رع دوای ئه‌وه هاتن كه ئەمڕۆ جارێكی تر دۆناڵد ترەمپ، سەرۆكی ئەمریكا بە كەناڵی فۆكس نیوزی راگەیاند، لە ئیسرائیل بێ هیوا بوم؛ ئەوان ناتوانن هیچ بکەن بەبێ روخاندنی بیناکان لە لوبنان، وتیشی، نزیکم لە رادەستکردنی شه‌ڕی حزبوڵای لوبنان بە سوریا و پێدانی هێز بە ئەحمەد شەرع سەرۆكی سوریا.