نێچیرڤان بارزانی، سه‌رۆكی هه‌رێمی كوردستان له‌گه‌ڵ عه‌لی زه‌یدی، سه‌رۆك وه‌زیرانی راسپێردراوی عێراق كۆبوه‌وه‌و پشتگیریی خۆی بۆ سه‌رخستنی هه‌نگاوه‌كانی پێكهێنانی كابینه‌ی نوێ و سه‌ركه‌وتنی حكومه‌ته‌كه‌ی ده‌ربڕی.
ئاوێنه: سه‌رۆكایه‌تی هه‌رێم له راگه‌یه‌ندراوێكدا وتی، ئێوارەی ئەمڕۆ دوشەممە، نێچیرڤان بارزانی، سەرۆکی هەرێمی کوردستان، لە درێژەی زنجیرە دیدارەکانیدا لە بەغدا، لەگەڵ عەلی زەیدی، سەرۆکوەزیرانی ڕاسپێردراوی عێراقی فیدراڵى کۆبوەوە.
وه‌ك له راگه‌یه‌ندراوه‌كه‌دا هاتوه، لە کۆبونەوەکەدا، نێچیرڤان بارزانی وێڕای دوپاتکردنەوەی پیرۆزبایی بۆ ڕاسپاردنی بە ئەرکی سەرۆکایەتیی حکومەت، هیوای سەرکەوتنی بۆ زه‌يدى خواست و ئامادەیی و پشتگیریی تەواوی هەرێمی کوردستانی بۆ سەرخستنی هەنگاوەکانی پێکهێنانی کابینەی نوێ و سەرکەوتنی حکومەتەکەی دەربڕی.
هه‌ر به‌پێی راگه‌یه‌ندراوه‌كه، لای خۆیەوە، عه‌لی زەیدی سوپاس و پێزانینی بۆ هەڵوێستی ئەرێنی و پشتگیرییەکانی نێچیرڤان بارزانی نیشان دا، هه‌روه‌ها هەردولا جەختیان لە گرنگیی خێراکردن لە پێکهێنانی حکومەتێکی نیشتمانیی کارامە کردەوە کە ببێتە چەتری کۆکەرەوەی هەمو پێکهاتەکان و وەڵامدەرەوەی ئاڵنگارييه‌كان و ویست و داواکارییەکانی هاوڵاتییان بێت.
سه‌رۆكایه‌تی هه‌رێم وتوشیه‌تی، هه‌ر له‌مباره‌يه‌وه هه‌ردولا داكۆكييان لە کارکردنی هاوبەش کردەوە بۆ چەسپاندنی سەقامگیریی سیاسی و ئەمنی و دۆزینەوەی چارەسەری ڕیشەیی بۆ کێشەکانی عێراق به‌گشتى و هەولێر و بەغدا به‌تايبه‌تى، بە شێوەیەک کە ماف و شایستە دەستورییەکانی هەمو لایەک پارێزراو بن.
به‌گوێره‌ی راگه‌یه‌ندراوه، لە کۆتاییدا، هەردولا هاوڕا بون کە قۆناغەکە پێویستی بە هەماهەنگیی ئاستبەرز و کاری پێکەوەییی نێوان تەواوی هێز و لایەنە سیاسییەکان هەیە، بۆ تێپەڕاندنی ئاستەنگەکان و هەنگاونان بەرەو داهاتویەکی گەشتر و سەقامگیرتر بۆ ته‌واوى وڵات.