نەوزاد بەندی 

جاران هەمووان موسوڵمان بووین و یەک موفتی هەبوو ، ئەویش حەمام بوو ..

ئێستا هەر گەڕەکێک دوو سێ موفتی تیایە ، کەچی خەڵکەکە بەس لە موسوڵمان ناچن 

٭         ٭            ٭

جارانیش

پاتە دڕاوەکەی  پێیان ، 

میللەت بوو ..

ئێستایش ، هەروەها ..

٭         ٭        ٭ 

جاران خەڵک پیاسەی ئەکرد ،

ئێستا  سەیارە   ..

٭          ٭           ٭

جاران  

دڵمان هەبوو ،

ئێستا ، دکتۆری دڵ ..

٭        ٭          ٭

جاران خەڵک وەک یەک وابوون ،

ئێستا کەس لە کەس ناچێ ..

٭          ٭           ٭

جاران ، 

هەژار برسی بوو ،

ئێستا دەوڵەمەند ..

٭ٓ         ٭        ٭

جاران

حوکمەت  ، حوکمەت بوو ..

ئێستا (کمە)کەی فڕێ دا ، 

بوو بە (حوت ) 

٭          ٭          ٭

جاران  ،

بۆ خۆشیی شیعرم ئەنوسی و

لە داخا ڕیشم ئەهێشتەوە ..

ئێستا ، لە داخا شیعر  ئەنووسم و 

بۆ خۆشیی ڕیش ئەهێڵمەوە ..

٭       ‌     ٭              ٭

 جاران بەردەم ماڵی دەستڕۆیشتوو ،

 مەرکانەیەک ئاو و 

جامێکی فافۆنی لێ دانرابوو ..

نووسرابوو  : ڕەحمەت لەوەی ئاو ئەخواتەوە ..

ئێستا ، 

وەنەوشەیەکی درع و 

کابینەیەک و 

چەکدارێکی چاوباشقاڵ ..

پیاوم ئەوێ بوێرێت بەو سایدەدا تێپەڕێ ..

٭            ٭              ٭

جاران دراوسێکان 

قاپە پەڵپینە و ناوساجییان ئەدا بە یەکتری ..

ئێستا ، پاسوۆردی وایفای ..

٭          ٭           ٭

جاران کچ شانەی دار  و 

کوڕ دارلاستیکی بە دەستەوە بوو ..

ئێستا یەکێکیان ئایفۆن و

ئەوەی تریشیان ، هەر ئایفۆن ..

٭           ٭             ٭

جاران ، نەڕەی  باوک  ڕۆژە ڕێیەک ئەڕۆیشت ، 

ئێستا باوک خواخوایەتی بە سەریا نەنەڕێنن  ..

جاران ئیلهامی شیعر و شنەی شەماڵ  بە دێلیڤەری ، ماڵە و ماڵی ئەکرد ، 

ئێستا پیتزا  ...

 ٭        ٭        ٭

جاران ، بە جەژنا ، 

پیاوانی گەڕەک ئەگەڕان ، بۆ گەردن ئازایی 

ئێستا مناڵی گەڕەک بۆ نوقوڵ ..

٭     ٭     ٭

جاران 

نوقوڵی ترش و شیرین هەبوو ، 

ئێستا هەواڵی تاڵ و تفت ..

تەلەفزیۆنی جاران ، 

بۆ تەمسیل و گۆرانی داواکراو بوو ..

تەلەفزیۆنی ئێستا ، 

بۆ پلەیستەیشن و 

هەواڵی موچە و 

ڕووداوی هات و چۆ و 

سووتانی بازاڕ  ..

٭       ٭       ٭

بێژەری جاران ، 

یەکپارچە ئەدەب و ڕەوشت بوو ..

هی ئێستا کە دەم لار ئەکاتەوە ،

ئەڵێی قەحبەی بەغایە !

٭       ٭      ٭

جاران  کچ بە دەم قسەی ئەکرد ،

ئێستا بە لوت ..

٭         ٭          ٭

جاران باوی کتێب بوو ، 

هی زانست و ڕۆشنبیریی ..

ئێستا باوی دەفتەرە  ،

هی دۆلار و یۆرۆ ..

٭         ٭          ٭

جاران له بەغاوە پوشە خورما ئەهات ،

ئێستا ، موچە ..

٭        ٭         ٭ 

جاران  ( خسوسیی  ) تایبەت بوو بە ئوتومبیل ..

ئێستا زۆر شتی خسوسیی پەیا بوون ، وەک 

مامۆستای خسوسیی ..

پزیشکی خسوسیی ..

فیتەری خسوسیی ..

٭       ٭       ٭

جاران دڵی کوڕ و کچ ، 

تەنها یەک کەسیان تیادا ئەسیر بوو ، 

ئێستا دڵی کوڕ ئەڵێی مەکتەبی کچانە و 

دڵی کچیش وەک مەنتیقە سەناعییەکە ..

٭           ٭            ٭

جاران خەڵک چاوەڕێی خوێندنەوەی بەیاننامەی یانزەی ئازار بوون ، 

ئێستا ، چاوەڕێی خوێندنەوەی لیستی موچە ..

٭      ٭     ٭

جاران خەڵکەکە هەر یەکی نیسان درۆیان ئەکرد ..

ئێستایش خەڵکەکە هەر یەکی نیسان درۆ ئەکەن  ..

بەڵام حوکمەت ، ساڵ چوار وەرزە ...

٭           ٭            ٭ 

جاران  ماڵ چۆڵ و هۆڵ بوو ،

دڵ پڕا و پڕ له جوانی ..

ئێستا ماڵ پڕە لە کەل و پەل ،

هەمووانیش  بۆ پەل و کەل ئەکڕوزێنەوە  ..

٭       ٭       ٭

جاران شەڕە مناڵ هەبوو ، 

ئێستا شەڕە حیزب و شەڕە کوتلە و شەڕه سەرۆک  ..

٭           ٭            ٭

جاران سەعات دەی شەو ، خەڵک هەموو خەوتبوون ..

ئێستا سەعات یانزەی شەو ئەڕۆنە دەرێ بۆ پیاسە ..

٭           ٭           ٭

جاران پارە شتی پێ ئەکڕرا ، 

ئێستا خەڵکی پێ ئەکڕرێ ..

٭       ٭       ٭

جاران خەڵکی لادێ بۆ نان و کەبابێ ئەهاتنە شار ..

ئێستا  بۆ دۆنم و تاوەر و خەستەخانەی ئەهلیی ..

٭          ٭          ٭

جاران 

هاوڕێیەتی و خزمایەتیی

جوانکارییان تێدا ئەکرا ..

ئێستا ، لوت  ..

٭       ٭        ٭

جاران مناڵ پارەی تەبع ئەکرد ،

ئێستا پۆڵ برێمەر ..

٭      ٭      ٭

سەرۆکحیزبی جاران ،

هەر خۆی  کوێخا ڕینگۆی ساحە بوو ..

ئێستا خۆی  و کوڕەکانی و 

هەموو ئەوانەی بە زێراب پێی دەگەنەوە ..

٭        ٭          ٭

جاران

حاڵەتێ هەبوو ، 

پێی ئەووترا تێر خواردن ..

سیفەتێ هەبوو ، 

پێی ئەووترا شەرم ..

ڕیزبەندییەک هەبوو ،

پێی ئەووترا گەورە و بچووکیی ..

شتی تریش .....