کولتوری شارێک بەپارەی داهات‌و گومرک‌و سەرانە ببرێ بەڕێوە هەروەک دەسەڵاتدارەکانی بەزۆر دروستکراو ئەبێ، کولتوری شارێکی زامداری وەک سلێمانی بەخوێ خستنە سەر زامەکانی بەرەو چاک بوون ناڕوات...

پەنجاو شەستەکانی، سلێمانی چەتری نەبوو، بەڵام هەردی‌و دیلان‌و تیپی مەولەوی‌و تیپی مەعاریف‌و ... هەبوو، زۆریش سەرکەوتوو بێ غەوش بوون. چونکە ئەوانەی بەرپرسیاریەتی کلتورییان هەبوو خۆشیان پاک‌و بێ غەوش بوون.

حەفتاکانی سلێمانی چەتری کلتور نەبوو، بەڵام کۆمەڵ‌و تیپی سلێمانی‌و پێشڕەوی شانۆی کوردی‌و مۆسیقای سلێمانی‌و ئاسۆی سەلطەو ئیسماعیل خەیات‌و سمکۆ ناکام‌و چێوارو کێ‌و کێی هەبوو، شارەکەش بێ چەتری لەکارکەوتوو فەزایەکی هونەری‌و کلتوری‌و ئەدەبی شایستەی بەشارەکە هەبوو.

هەشتاو نەوەدەکانیش کولتور لەمەترسیدا نەبوو، خۆ کلتور (بەیتەرە) نییە ئەسپ بخەیتە سەر شانۆ!!

کلتور رێگر نییە لەوەی خەڵکی سیاسەت بکا، بەپێچەوانەوە بۆ نەهێشتنی دزی‌و گەندەڵی‌و خۆسەپانن ئەبێتە سیمبوڵ‌و هاندەر تا خەڵک ئەو حزب‌و ئایدۆلۆژیانە هەڵبژێرن‌و کاری تیا بکەن کە نەیاری کلتوری دیکتاتۆری‌و نەخوێندەواری‌و دژ بە بەرژەوەندی خەڵکی سادەو کەم دەرامەتن.

کەسێک خۆی لەئاستی پێویستدا بێ هیچ پێویستییەکی بەچەتر نییە، هەر بەرزکردنەوەی چەترێک خۆی لەخۆیدا مایەی گومان‌و تێڕوانینە، پێش ئەوەی چەتر بدەنە دەستی خەڵکی توڕەو بێزار لەو کلتورە، لەو کەڵەکە تڕێیەی تێکەڵ بەبارانی چەتەیی‌و بێ بەرپرسیارێتی‌و بەشەق خۆ دەوڵەمەند کردنەی دروستیان کردووە، خۆتان کەمێک، کەمێک ئەو کلتورەی باوو باپیرانمان دایانهێناوە بپارێزن‌و با چیتر کولتور نەبێ بەشوقەو کۆڕنیش‌و رەشبەڵەکی موهەریج‌و قەرەقۆزو ئالوودەبووەکانی دۆلارو وەنەوشە...

کولتور تێکەڵ بەخەڵکەو، ئێوەش دوورن لەخەڵک، کولتور پارێزەری رابردوومانەو، ئێوەش نەک رابردوو، ئایندەکەش وێران ئەکەن.

تۆ بڵێی چەترەکەتان دڵۆپەی (رابردووتان)!! وشک کاتەوە؟ ئێوە باسی کلتورێک ئەکەن کە "علوج"ە.