پەرلەمان وەک بەرزترین دامەزراوەی یاسادانان و چاودێری لە ھەر سیستەمێکی دیموکراتیدا، ستوونی سەرەکیی پاراستنی مافی ھاوڵاتیان و ھاوسەنگیی دەسەڵاتەکانە. ئەرکی سەرەکیی ئەم دامەزراوەیە لە دەرکردنی یاسای نوێ، ھەمووارکردنەوەی یاسا کۆنەکان بەپێی پێداویستییەکانی کۆمەڵگە، چاودێریکردنی وردی کارەکانی حکومەت بۆ ڕێگریکردن لە گەندەڵی، گەیاندنی دەنگ و داواکارییەکانی ھاوڵاتیان بە ناوەندەکانی بڕیارداڕشتن و پەسەندکردنی بودجەی گشتیدا دەبینرێتەوە.
کاتێک پەرلەمان لە کارایی دەکەوێت و پرۆسەی پێکھێنانی حکومەت دوادەکەوێت، یەکەم زەرەرمەندی سەرەکی خودی دەسەڵات خۆیەتی، چونکە ڕەوایەتیی یاسایی و جەماوەریی خۆی لەدەستدەدات و بەھایەکیش بۆ پرۆسەی دەنگدان و سندوقەکانی دەنگدان نامێنێتەوە کاتێک ئیرادەی ھاوڵاتیان لە بڕیارداڕشتندا پەکی دەکەوێت. ئەم بۆشاییە سیاسیە زیانی ڕاستەوخۆ بە ژیانی ڕۆژانەی ھاوڵاتیان دەگەیەنێت و لاوازبوونی متمانەی جەماوەر بە پرۆسەی حوکمڕانیی لێدەکەوێتەوە. ڕەنگدانەوەی ئەم ئیفلیجییە لەسەر ئابووری زۆر سەخت دەبێت، بازاڕ تووشی سستبوون و بێبازاڕییەکی قووڵ دەبێتەوە، وەبەرھێنان و سەرمایەگوزاریی دەرەکی بەھۆی نادیاریی داھاتووی یاسایی و داراییەوە پەکی دەکەوێت و کۆمپانیای بیانی پاشەکشە دەکەن. لەسەر ئاستی دیپلۆماسیش، پێگەی وڵات لەبەرامبەر کونسوڵخانەکان، وەفدە بیانییەکان و کۆمەڵگەی نێودەوڵەتی بەتەواوی لاواز دەبێت، چونکە نەمانی حکومەتێکی کارا و پەرلەمانێکی یاسایی وا دەکات وڵاتانی دەرەوە بە گومانەوە لە ڕێککەوتننامەکان بڕوانن و ھاوکاری و پەیوەندییە دیپلۆماسییەکان دابەزن بۆ نزمترین ئاست.
بۆ تێپەڕاندنی ئەم چەقبەستووییە، پێویستە دەسەڵاتدارانیش فۆڕم و شێوازی حوکمڕانیی خۆیان بگۆڕن، دەبێت دەسەڵات وەک باوکێک لە خەمی میلەتەکەیدا بێت و ئامادەیی قوربانیدانی ھەبێت تا ژیان و گوزەرانێکی شایستە بۆ ھاوڵاتیان دابین بکات. پێویستە دەسەڵاتداران لە تەلاری بڕیارەکان بێنە خوارەوە و بچنە ناو جەماوەر، گوێ لە دەنگدەرانیان بگرن تا متمانەی نێوانیان بەھێزتر بێتەوە، چونکە میلەت ماندووە لە قەیرانە بەردەوامەکان و ئیتر کاتی ئەوە ھاتووە ئاسوودە ببن و لە سایەی ئارامیی سیاسی و ئابووریدا بژین. ھاوکات لە ئێستادا پێویستە دیالۆگێکی جدی و بێمەرج لەنێوان ھێزە سیاسییەکان دەست پێبکات بۆ گەیشتن بە سازانێکی نیشتمانی لەسەر بنەمای پابەندبوون بە وادە دەستوورییەکان، لەگەڵ پێداچوونەوە بە پەیڕەوی ناوخۆی پەرلەماندا.
سەرەنجام، کاتی ئەوە ھاتووە تەواوی شەرعییەت و شکۆ بۆ پەرلەمان بگەڕێندرێتەوە، چونکە پەرلەمان تەنھا باڵەخانەیەک یان سەکۆیەکی حزبی نیە، بەڵکو مەرجەعی باڵا و بنەڕەتیی سەرجەم بڕیارە نیشتمانییەکانە. گەڕاندنەوەی شکۆ بۆ ئەم دامەزراوەیە، تاکە گەرەنتییە بۆ کۆتاییھێنان بە بۆشایی سیاسی، پاراستنی سەروەریی یاسا و زامنی سەقامگیرییەکی بەردەوام بۆ تەواوی کۆمەڵگە.