قسەکردن لەسەر مانگرتوانی شاری سلێمانی، پشتگیری ناکرێن، حەق نیە، لۆمەیان بکرێ و بەرەیەک لە دژیان بکرێتەوە.
دژایەتی و لۆمەی مانگرتوان، ئەمە کارێکی ناڕەوای دەسەڵات و نزیکەکانیەتی!
فەرمانبەر و مامۆستا، ئەوان مووچەخۆرن و پێویستە مانگانە مووچەیان پێبدرێت.
ئەم مووچەیە لەکوێ دێت و چۆنە گرنگ نیە، پێویستە دەسەڵات خەمێکیان لێ بخوات، ئەگەر پێیان ناکرێ باشترە ئەوانەی لەسەر دەسەڵاتن دەستلەکار بکێشنەوەو بڕۆن!
خەڵک نانی دەوێ، فەرمانبەر مووچەی نەبێ و مافەکانی بۆ دابین نەکرێ، ئەی بەچی بژی و ماڵ و منداڵی چۆن بەخێو بکات!
پێش دە ساڵ خەڵک بانگەشەیان بۆ ئازادی بوو، کۆمەڵگە لەقۆناغێکی دیکەبوو، ئەوکات خەڵک ترسی لە دەسەڵاتی جووت حزبی کوردی بوو چارەنووسیان بەئاراستەیەکی خراپ ببەن، بەڵام دەرکەوت خراپتر کۆمەڵگەیان برسی کرد.
ئەمڕۆ خەڵکی نانی نیە، مووچەی پێنادرێ و خەریکە دەرگاکانی خۆشبەختی لێ دادەخرێ، کەچی هێشتا کەسانێکی نێو دەسەڵات پێیانوایە داوای مووچەو نانکردن پیلان و مووئامەرەیە!
لەلاشەوە قافڵەی ئۆتۆمبێلی بەرپرسان و ماڵی بەرپرس و دیوەخانەکان هەر زیاد دەکەن، پاسەوانی بەردەرگاو سەرجادەکان چاو دەردەهێنن!
هەرێمی کوردستان، شەش ملیۆنە دوو هێندەی وڵاتی ئیتاڵیای شەست ملیۆن کەسی کەناڵی تەلەفزیۆنی و زانکۆ و دەرمانخانەو نووسینگەی خانووبەرەو کۆمپانیای حزبی هەیە!
ئەی ئەمانە بەپارەی کێ و بەچی بەڕێوەدەچن، گەر پارە نیە، ئەم دامەزراوەو کۆمپانیاو مێدیا بێ داهات و بەرهەمانە پارەیان لە کوێ هێناوەو بەچی بەڕێوەدەچن!
ڕووسی و ئۆکرانی و هاوڵاتی دەوڵەتەکانی ئەوروپای ڕۆژھەڵات هەڵدێن، هەتا ئێوارە بڵێ وڵاتانێکی جوانتان هەیەو ئازادی کۆمەڵایەتیان هەیە بۆ دانانیشن؟!
کابرا دەڵێت: چی لە جوانی بکەم نانم نیەو مووچەکەم بەشی هیچ ناکات، کەواتە برسێتی لەسەرووی هەموو شتێکەوەیە!!