دوای ساڵێک لەتەمەنی کابینەی نۆ، چاکسازییەکانی چین؟
هۆشیار عەبدوڵا
2020-07-10 919
یەکەم:
دوای تێپەڕبونی ساڵێک بەسەر تەمەنی کابینەی نۆ دا،چاکسازییەکانی حکومەتی هەرێم مەگەر ئەم خاڵانەی خوارەوە بن ؛
۱.دواخستن و کەمردنەوەی موچە.
۲.لەگەڵ بەغدا رێکدەکەوین تەنها بە قسە.
۳.دامەزراندنی یاریدەدەر بۆ سەرۆک بە جوملە.
٤.هێشتنەوەی مەلەفی نەوت بەهەمان سیاسەتی کابینەکانی رابردوو.
٥.هێشتنەوەی داهاتی ناوخۆ و گومرگەکان لەناو تاڵانیی و جەردەییەکانی زەمانی زوو.
٦.سەرباری بونی وەزارەتێک بۆ تەندروستی دامەزراندنی دەزگایەک بۆ دەرمان.
۷.هێشتنەوەی بندیوار و حزبی و ناوی دوبارە لە ناو لیستی موچەخۆران.
۸.قڕ و قپکردن بەرامبەر تەراتێنی سوپای داگیرکەران لەناو خاکی هەرێمی کوردستان.
۹.تۆخکردنەوەی دێگەڵە وەک سنوری نێوانیان.
فەزیحەکانیی تری وەک وەعد و قسە پێچەوانەکانی بەرپرسانی حکومەت بەتایبەت سی ملیار قەرزەکە کە دوایی بو بە ئیلتیزامات و ٤٠٠ ملیارە بێ سەروشوێنەکە و بەڵێنی کردنەوەی هەژمارەی بانکی بۆ فەرمانبەران(ئەگەر پێیان خۆشبێ!) و تیرۆری کەسایەتی مەعنەوی تەماتەی کوردی ناکەمە خاڵی سەربەخۆ،حەتمەن کابینەی نۆ دەسکەوتی زیاتری هەن من هێندەم لە بیرن،خۆ ئەگەر تۆی لایەنگر و پشتیوانی ئەم(هەڵپەركێ سێ پێییە) پێت وایە ئێمە هەڵەین و هەنگاوی تری گەورەی چاکسازی نراون فەرمو بۆمان بژمێرە و باسیان بکە.
دووەم:
ئەو بەڵێنە شەش مانگییەی لە کابینەی نۆ درابو بۆ چاکسازی بو بە ساڵێک و هیچی لێ سەوز نەبو!!ئێستا ئیدی وازیان لەوە هێناوە کات بۆ چاکسازی دیاریبکەن دەڵێن گرنگ ئەوەیە بکرێ جا کەی؟گرنگ نیە!
ئێستا سەردەمیی تاوانکردنە بەناوی چاکسازییەوە،مەگەر کەمکرنەوەی موچەیان ناو نەناوە رێکخستنەوەی موچە؟!ئەوەی کە بریارە و وەعدە و بەیاننامەیە کە تەنها بۆ یەک مانگ دەبێت و بەس.
سێهەم:
حوکمڕانی بە ئینشا و پیاهەڵدان و خۆڵکردنە چاوی خەڵک و فرۆشتنەوەی شکست بە تامیی سەرکەوتن نابێ،بە بەڵێنی بێ ئاسۆی جێبەجێبون و بەوەش نابێ لەگەڵ شەقام دو ڕوو بی،ساڵێک تەمەنی ئەم کابینەیە بەسە بۆ ئەوەی لێت رون و ئاشکرا بێ کە تا سەر ئێسقان شکستخواردوە بوە و دەبێ چونکە نەک ساڵی یەکەم ۱٠٠ رۆژی یەکەم سیگناڵ و موئەشرێکی باش و زانستییە بۆ هەڵسەنگاندنی هەنگاو و پلانە ستراتیژیەکانی هەر حکومەتێک،ئیدی چاکسازی چیی؟!کامە؟کوا؟کەی؟