ڕۆژگارێک بزوتنەوەی گۆڕان، وەک هێزێکی تۆکمەی دژە تەوریس و دژە تەزویر جاڕی چاکسازی و دژایتتیکردنی گەندەڵی و هێنانەکایەی دەسەڵاتێکی هاوڵاوتی و هاونیشتمانی ویستی دەدا، دوای وەفاتی نەوشیروان مستەفا، ئێستا دوو گۆڕان یەکتری بە (تەوریسچی و تەزویرچی) تۆمەتبار دەکەن، دوو گۆڕان لەناو یەک حیزب و لەژێر سێبەری یەک ئاڵادا، دوو گۆڕان کە نەوشیروان مستەفا یەک ڕێکخەرو دامەزرێنەری بوو، چاوەڕێبوین یاسا و کۆمسیۆن و فەرمانگەی حیزب و ڕێکخراوەکانی بەغدا گۆڕان لەسەر لایەکیان ساغبکاتەوە، چاوەڕێبوین ئەو گۆشەیەی گۆڕان وەرەگرێتەوە بەیاننامەیەکی نەرمی ئاشتیانەی گۆڕانخواز ویست بڵاوبکاتەوەو بانگی کۆکردنەوەی کۆی گۆڕانخوازان لەدەوری بزوتنەوەکە بدات.
چیمان بینی؟ دوو بەیاننامەی پڕ لە ڕق و کینە، دوو بەیاننامە نا سیاسی نا پەرپرسیارانە، دوو بەیاننامە وەک ئەوەی دوو نەخوێنەواری کۆڵەواری سیاسی نوسیبێتیان، دوو بەیاننامەی جاڕی دوو کەرتبونی هەتا هەتایی بزوتنەوەی گۆڕان، دوو بەیاننامە بەجۆرێک که هەرگیز ئەم دوو جەمسەرە بۆ هەتا هەتایە ناتوانن دوو هاوسێ و دوو هاوڕێ و دوو حیزبی ناو ئامانجە باڵاو ناوچوارچێوە گشتیەکەی بزوتنەوەی گۆڕان بن.
لێرەوە من بڕوای تەواوم بەوەیە تۆزو خۆڵی بەرپرسەکانی هەشت ساڵی ڕابردووی گۆڕان بەسەر ئەم هەموو هەڵەو ڕق و کینە لەبن نەهاتوەوەیە، بڕوای نەگۆڕم بەوەیە کە ئەبێت یەک بەرپرسی پێشتری ئەو بزوتنەوەیە لەناو گۆڕانی کەرتبوی داهاتودا نەمێنن، چونکە هەموو جڤاتەکانی پێشووی گۆڕان، هەموو بەرپرس و یەک بەیەکی تیمی حکومی گۆڕان بەشدارن دوو کەرتبوونی گۆڕان و نەخشەی بزوتنەوەکە.
گۆڕانی ئێستا حیزبەکانی هەرێم و سەرۆکەکانیان پیرۆزبایی جەژن لە (دانا ئەحمەد مەجید) دەکەن وەک ڕێکخەری بزوتنەوەکە، گۆڕانی ئێستا فەرمانگەی حیزب و ڕێکخراوەکان لە بەغدا (گردەکەی زەرگەتە) دیاری دەکەن وەک چەقی بزوتنەوەکە و شوێنی کۆنفرانس...
ڕونتر گۆڕانی ئێستا لەهەرێم دراوە بە (کودسات) و لە بەغدا دراوە بە (گردەکەی زەرگەتە).
بەڵام بەهەولێر و بەغدا و بەهەموو گۆڕان ستراتیژو دەستێکی هاوکاری و قەڵەمێکی خێر نەبوو پێکەوە دوو گۆڕانە لەتبوەکە کۆبکاتەوە.
ئایا گۆڕانی داهاتوو چۆن دەبێت؟ دڵنیام کەس نییە بزانێت.
ئایا گۆڕانی داهاتوو چۆن دوو کۆنفرانس لەدوو شوێنی جیاو لەژێر یەک ئاڵادا ئەنجام دەدات؟ دڵنیام تەنها یەک کەس نییە بزانێت.
ئەکەر ببنە دوو حیزبی جیاواز، کە ئەوەی بەڕونی دەردەکەوێت هیچیان کەرەستەیەکی سیاسی وردو بە ئاگاو هیچیان هێزێکی مرۆیی سیاسی ئەوتۆیان نییە کە توانای دروستکردنی بڕیاری سیاسی گونجاوی ژیرانەیان هەبێت، ئایا دۆخی داهاتوویان بەو هەموو ڕق و کینە ناسیاسییەوە چۆن دەبێت؟
چونکە ئەوەی بەڕونی لەفەیسی سەرکردایەتی هەردوو لادا دەردەکەوێت، کەمترین کەسایەتی سیاسی و کەمترین کەسیان لەگەدایە کە درک بەدۆخی سیاسی ناوخۆیی و هەرێمی و ناوچەیی و جیهانی بکات، هەر دوولا کەمترین کەسیان لەگەڵدایە کە لەئاستی سەرکردایەتی داهاتووی بزوتنەوەکەدابێت بەو هەموو نەخۆشیە سیاسی و شەخسیەوە.
لەهەرلایەکی ئەم دوو بەرەیە دەڕوانیت سەرکردایەتیەکانیان لەباشترین حاڵەتدا لە ڕابردوودا توانای بەڕێوەبردنی نەک مەکۆ بازنەیەکی بزوتنەوەکەیان نەبووە.... کە دیسان سەرجەمیان بەتەمای سەرکردایەتی داهاوون لەهەردوو لاو زۆرینەشیان بەڵێنی سەرکردایەتیان پێدراوە.
شەڕی ناسیاسی ئەم دوو لایەنە هەرچۆنێک بیخەیتە ژێر مایکرۆسکۆبی سیاسیەوە ناتوانیت لەشەڕی دەستبەسەرا گرتنی موڵکەکانی بزوتنەوەکە جیای بکەیتەوە، هەرچۆنێک وردی کەیتەوە ناتوانین دوای ئەو دوو بەیاننامە ناسیاسیە نائاشتیانەیەی بیست و چوار سەعاتی ڕابردوو هیچ ئومێدێکی پێکەوە کارکردنی داهاتووی تیادا ببینیتەوە..
ئیتر ناچاردەبین بپرسین ئایا ئەمانە کەرەستەی داهاتووی سەرکردایەتیکردنی بزوتنەوەی دوو کەرتبووی گۆڕانن؟
ڕونتر لەم دۆخەدا بۆ ئێمەومانان (قوڕ) باشترین دیاریە هەرکەسێک بۆمان پەیداکات.