رۆژگارێکی سەیرە ،جاران ھەموو شتەکان رۆحێکی میھرەبانی و خۆشەویستی مرۆڤ و بەھای مرۆڤایەتی و وەفا بوو، پڕ بوو لە عەشقی  نیشتیمان، ئێستا بەھا کان کراون بە جەستەیەکی مردووی بەرژەوەندییە  تایبەیتە نەرجسییەکان  . تەنانەت  ھاورێیەتی و خۆشەویستی و شکۆی مرۆڤایەتیش. 
                                
ھاوڕێ ،  ئێستا رۆژە رەشەکانت لە یاد کردوە ،نەڕاو بۆچونەکانی ئەوسا دەناسیتەوە ، نە ئەو زەمەن و نە ئەو  لەیەکتر گەیشتنەی  کە داڵدەت بوون ، ئەو دەمانە تۆ ھەموو  لاپەرەی نھێنییەکانت  بەو دەسپارد، تاڵی ئاڵۆزی کێشەکانت، رووبە رووی ئەو دەکردەوە،ئەویش گرێکانی بۆ واڵا دەکردیتەوە.

دنیایەکی سەیرە  ھاورێکەی جاران ، ئەمە ناونیشانی چ دابڕانێکە،لەم تەمەنە کورتەدا دەیخوێنینەوە ،ھەموو یادەوەری  شەو ورۆژ و ساڵەکان کاڵ دەبنەوە دەمرن ،نەلێ ی تێدەگەین ،نەلێمان  تێ دەگەن. 
ئێستا ، جارانی زوو دنیایەکی غەریبە لات ،نە تەمەنی جوامێری دەناسیتەوە، نە ھەڵوێستەکانی جاران .

ئەمە یاسای سروشتی سەردەمی نوێی جیھانگیرییە، دوای چەندان ساڵ دابران و گەڕانەوە یادەوەرییەکان ، لە دامێنی رێکەوتێکی چاوەڕوان نەکراودا، بە تەنیشت  ھاوڕێکەی جارانتا تێدەپەریت  ،بەقوڵی لێی دەڕوانیت، نەسڵاوی گەرمی جارانی  لێ دەکەیت ، نە ھەواڵی تەمەنی پر لە حەسرەتی مەرگەساتەکانی لێ دەپرسێ، تۆئێستا کەسێکی تریت، ئەویش مرۆڤێکی نامۆ بە تۆ.   

 ئێستا تۆ نە چاوە کاڵەکانی ھاورێکەت ، نە بیرەوەرییەکان، نەھەناسەی گوندە سوتماکەکان، نە باڵای چیاکان، نە گوڵی وەریوی وەفا  دەناسیتەوە.

ئیستا تۆ کەسێکی تریت وئەویش غەریب  بە تۆ ، لای تۆ دیمەنەکان کاڵ بونەتەوە، یادەوەرییەکان وردو خاش کراون، ئەویش ھەر مرۆڤە سادەکەی جاران ی چیاوئەوساو ئێستای  گەڕەک و شارەکەتە؟!