فەرمانگەی داواکاری گشتی لەسلێمانی ڕۆژی چوارشەممە ڕێکەوتی٢٦/٣/٢٠٢٥ بە واژۆی دادوەر(مەهدی ڕەشید فەرەج)بەرپرسی فەرمانگە، نوسراوێکی بۆ بەڕێوەبەرایەتی ڕاگەیاندن و چاپ و بڵاوکردنەوەی سلێمانی ڕەوانە کردوە و لەبارەی ڕوماڵی هەواڵی کوشتنەوە لەلایەن ڕۆژنامەنوسانەوە، داوای پابەندکردن و خۆ دور گرتنی ڕۆژنامەنوسانی لەڕوماڵکردنی ئەو جۆرە هەواڵانە کردوە، ئەگەرنا ڕێکاری یاسایی بەرامبەر هەر میدیایەک دەگرنە بەر، بە کۆمەڵێک پاساوی وەک ""لەکاتێکدا ئەوان سەرقاڵی لێکۆڵینەوەن ڕاگەیاندنەکان ئەو ڕوداوانە دەکەنە هەواڵی بە پەلە و زانیاری هەڵە و بێ بنەما بڵاو دەکەنەوە، چاوپێکەوتن لەگەڵ کەسوکاری کوژراو دەکەن، کە کاریگەری نەرێنی لەسەر باری دەرونی تاک و هەرزەکاران هەیە، بە لاڕێدابردنی ڕەوتی لێکۆڵینەوەیە و کاریگەری نەرێنی لەسەر ڕای گشتی و نەمانی متمانە لەکۆمەڵگەدا هەیە.""
بەر لەهەر شتێک داواکاری گشتی سلێمانی تا ئێستا بێدەنگترین و بێ هەڵوێسترین فەرمانگە و لایەنی پەیوەندیداری ئەم دەڤەرەیە و پێموایە یەکەمجارە دەنگێک بەرز دەکاتەوە، ئەویش لەسودی ڕۆژنامەنوسان و کۆمەڵگە نیە و دەتوانم بڵێم لەبەرژەوەندی دەستەڵاتی ستەمکاری دەڤەرەکەدایە، بەو بەڵگەیەی لەپشت لەهەمو تاوانێکی کوشتن و گرتن و دەستدرێژی کردنێکەوە لەپارێزگای سلیمانی دەستەڵاتی بنەماڵە و ینک هەن، زۆرینەی کوشتن و ئەو تاوانانەی ڕودەدەن یان تیرۆرکردن و بە ناحەق شەهیدکردنی گەنج و تاکە لەلایەن هێزی ئەمنی و بەڵتەچیەکانی دەستەڵاتەوە، یان کوشتنە بەهۆی گرفتی کۆمەڵایەتییەوە و سەرچاوەی زۆرینەی ئەو کێشە کۆمەڵایەتیانەیش خراپی ڕەوشی ئابوری و شێواوی حوکمڕانی سیاسی و تێکچونی شیرازەی خێزان و تێکدانی باری دەرونی تاکە و دەستەڵات لەپشتی ئەو گرفت و قەیرانانەوەیە، یان کوشتنی ژنانە و بکوژانیان لەجیاتی ئەوە ببرێنە بەردەم دادگا و سزایی یاسایی وەربگرن و داواکاری گشتی لەسەری بە دەنگ بێت، بە پێچەوانەوە دوای کەتن و تاوانەکە باشتر دەچنەوە پشت دەستەڵاتی ستەمکاری بنەماڵەوە و دەپارێزرێن، بەشێکی زۆری کوشتن و تاوان و ڕوداوە جەرگبڕەکان بەهۆی بڵاوبونەوەی ماددەی هۆشبەرەوەیە و ڕونە بازرگانانی ئەو ماددە مرۆڤ کوژە هەر دەستەڵات خۆیانن.
ڕۆڵ نەبینینی دادگا و یاسا لەبەرامبەر ئەو هەمو تاوانەدا و بە دوادانەچونی داواکاری گشتی و سکاڵا نەکردنیان و پاراستنی بەرژەوەندی دەستەڵاتە، کە دەبێت ڕوی سزا و بە دواداچونەکانیان لەوان بێت و یەخەیان بگرن، لەجیاتی ئەوەی ڕۆژنامەنوسان لەسەر ڕوماڵکردن و کاری پیشەیی خۆیان سزا بدەن، بەڵام ئەو بەشەی داواکاریەکەیان ڕاستە، کە دەڵێن دەبێت ڕۆژنامەنوسان و میدیا پابەندی کاری پیشەیی و ئیتیک و بنەماکانی کاری ڕۆژنامەوانی بێت.
بەڕێز داواکاری گشتی سلێمانی چارەسەری گرفت و تاوان و کوشتن لەم سنورە ڕێگەگرتن و سانسۆرکردنی ڕاگەیاندن ڕۆژنامەنوس نیە، بەڵکو سزادان و مامەڵەیی یاساییە لەگەڵ سەرچاوەی قەیران و تاوانەکان، کە دەستەڵاتی مافیایە و ئێوەیش لەئاستیاندا بێدەنگ و بێ ڕۆڵن.
جگە لەوە بەشێکی زۆری میدیا و دەزگای ڕاگەیاندن و ڕۆژنامەنوسانی ئەمڕۆی سەر گۆڕەپانی ڕۆژنامەوانی و سیاسی لەم دەڤەرە و ئەوانیتریش، بە ڕاستی دەزگای ڕاگەیاندن و ڕۆژنامەنوس نین، کادێر و گوێ لەمستی ستەمکاران و بە ناو بەرپرسەکانی ینک و بنەماڵەی تاڵەبانی و دەوروبەریانن، کە هەمو هێڵێکی سور بۆ مەبەستی حزبی و کەسی و بازرگانیەکانیان ژێر پێ دەخەن و هیچ ئتیک و پڕەنسیپ و ئەخلاقێک ڕایان ناگرێت..
کەواتە دادوەران و داواکاری گشتی سلێمانی و دادگا، ئەگەر چارەسەری بنەڕەتی بە لاڕێدا بردنی ئاکاری لێکۆڵینەوەکانتان و گوێنەدان بە یاسا و بڵاوکردنەوەی زانیاری هەڵە و چەواشەکردنی ڕاستی و نەمانی متمانە و کاریگەری نەرێنی لەسەر دەرونی تاک و کۆمەڵگەتان دەوێت، دەبێت سکاڵا و بە دواداچونی یاسایی بۆ ڕاگرتن و سنوردارکردنی دزی و تاڵانی ئەو دزانە بکەن، کە هەر یەکەیان کەناڵێک یان زیادتریان بۆ چەواشەکاری بە ناوی میدیاوە هەیە و کادێری خۆیان بۆ کاری چەواشە و هەواڵگری بە ناوی ڕۆژنامەنوسەوە خستۆتە گۆڕەپانەکەوە، بازرگانی بە ماددەی هۆشبەرەوە دەکەن و چیا دەڕوخێنن و زەوی و خاکی تاڵان دەکەن و سلێمانی وەک سەدام تەعریب دەکەنەوە و تیرۆر و کوشتن ئەنجام دەدەن و سەدان قومارخانەیان بۆ بە لاڕێدا بردنی گەنجی کورد کردۆتەوە و و شیرازە و دەسترازەی پەروەردەیی و کۆمەڵایەتی و سیاسی خێزان و کۆمەڵگە دەشوێنن و تێکیدەدەن و لەشکرکێشی دەکەن و پارێزگاکەیان سەرپڕ لەبنکەی سیخوڕی دوژمنان و هەواڵگری ئێرانی و عەرەبی عێراقی و تورکی کردوە و خاکی دەفرۆشن...
داخوازیەکەی داواکاری گشتی سلێمانی دەبێتە هۆی شاردنەوەی تاوانی کوشتن و تیرۆری دەستەڵات، ڕاگەیاندنکار و ڕۆژنامەنوس بە پشت بەستن بە ئەخلاق و بنەما پیشەیەکانی کاری ڕۆژنامەگەری بۆی هەیە بەدواداچون بۆ هەر ڕوداوێک بکات و ڕوماڵ بکات، داوکاری گشتی و دادوەرانیش ئەرکیانە بە دوای سەرچاوەی تاوان لەڕێگەی یاساوە بچن و سنورداری بکەن و تاوانبار یان تۆمەتباری ڕاستەقینە دادگایی بکەن، ناکرێت لەئاستی تاوانی دەستەڵاتدا بێدەنگ بن، ڕۆژنامەنوسان بێدەنگ بکەن و ئازادی کاری ڕۆژنامەوانی سانسۆر بکەن.
ڕونکردنەوەکەی ئەمڕۆ پێنجشەممە٢٧/٣/٢٠٢٥ی دادوەر سەڵاح لەتیف ئەندامی دەستەی داواکاری گشتی سلێمانی، مەبەستی داواکاریەکەی داواکاری گشتی وا باس کردوە، کە ڕۆژنامەنوس پابەندی ئیتیکی تایبەت بە ڕوماڵکردن بێت و گوایە لێکدانەوەی هەڵە بۆ داواکەیان کراوە، هەمان ناوەڕۆک دوبارە دەکاتەوە، بەهیوام ڕۆژێکیش داواکاری گشتی سلێمانی لەسەر ئەو هەمو تاوانە گەورە و زەبەللاحەی یەخەی پارێزگاکەی گرتوە، بێتە دەنگ و ڕێکاری یاسایی دژی دز و مافیا و بکوژان بگرێتە بەر و پابەندی یاسایان بکات...