موشەکبارانەکەی هەولێرو پیلانی دژە هەرێم

مەلا بەختیار

2021-02-16 917

دوای دەرچونی بایدن، هیوایەک بۆ چارەسەری سیاسی لە ناوچەکەدا، بە ئاسۆی سیاسیدا دیارە، بەڵام دۆخی عێراق، هێشتا بەپێی پیلانی سەردەمی ترامپ ئاراستە دەکرێ. هێزە پیلانگێڕەکانیش، هەر ئەوانەن کە خۆپیشاندەران لە بەغدادو بەسرە و سەماوە دەفڕێنن... سەرنگون و تیرۆریان دەکەن.
ئەم پیلانگێڕانە، گوایە ئامانجیان تێکشکاندنی ئەمریکایە. ئەمە ڕواڵەتی روداوەکانە. ناوەخنەکەی ستراتیژی تایفەگەری ترسناکە. ئەقڵیەتی تایفەگەری.. شیعە یان سوننە، جیاوازیان نیە. تیرۆرستانی سوننە، لە پێش و پاش روخانی سەدام، تاوان و ئامانجەکانیان دیار بوو. هی ئەم رەوتە تایفەگەرییە شیعەگەرایەش، زەق زەقە!
تیرۆریستە سونیگەراکان لە سوننەی سیاسی جیاکرانەوە. شەڕی داعش پاساوێکی بەهێز بوو، رەوتێکی شیعەی چەکدار، پێچەوانەی سیاسەتی زۆربەی هێزە شیعەکانی عێراق، کە لەناو پرۆسەی سیاسیی ئاسایی وڵاتەکەن، تەنها بازوی هێزی چەکدار بەکاربهێنن و هەتا ئەشتوانن ئاژاوە بگێڕن. ئەم رەوتە ئیستا کەمتر شەڕی داعش دەکەن، زۆرتر خەریکی بەرنامەی دوای داعشن!
هەرێمی کوردستان، لەناو بازنەی پیلانی ئەم هێزە تایفەگەراییەدایە، هەتا بە دەردی کەرکوک و خانەقین و شنگالی بەرن. بەڵگەشمان ئەوەیە، مادەی (140) کە جێ بەجێ ناکرێ... ئامانجی سیاسی-عەسکەری ترسناک هاندەری ئەم جێبەنەکردنەی مادە بنەڕەتیە دەستوریەیە. لەم چەند مانگەی دواییشدا کە نەک بودجە، بەڵکو موچەش خراوەتە قوڕگی تایفەگەریەوە، ئەمیش بەشێکە لەو پیلانەگێڕییەی دژی کوردستان لەئارادایە. لە کاتێکدا وەفدی کوردستان لە بەغدادە و هێزە شیعەکان هادی عامریان داناوە بۆ جۆرێک لە چارەسەری مامناوەنجی، کەچی لەم لاوە، پایتەختی کوردستان دەدرێتە بەر موشەک باران. ئەمەش ئەوە دەگەیەنێ رەوتی تێکدەری بەشێکی چەکداری شیعە، رێکەوتنی قبوڵ نییە!!
تەوقیتی ئەم کارانە، رێکەوت نییە. سیناریۆی تریشی بەدواوەیەو هەمووی مەترسین لەسەر هەرێمی کوردستان. هەروەکو چۆن مەترسیشن لەسەر خەباتی مەدەنی عێراق.
لام وایە کاتێتی، هێزە کوردستانیەکان، بەرنامەی سیاسی نەزۆکی ساڵی پار وەلا بنێین و دوور لە ڤیتۆی سیاسی نەگوجاو لەبەردەم پرۆسەی چارەسەری سیاسی ناوخۆ، هێزەکان و سەرکردەکان، بڕیاری بەرپرسیارانە بدەن بۆ کۆتایی هێنان بە سیاسەتی لێکترازان.. بەرەو سازان. ئەگینا ئەم کاتە کەمەی لەبەردەمیشدا ماوە، لەدەست دەچێ. ئەوکاتە کاڵەکیش دەستناکەوێت بە ئەژنۆی سیاسیماندا بیانکێشین!