ئه‌ڤ خۆپه‌رستییه هه‌تا که‌نگی؟
نزار پیرۆ
2021-02-02 630
نه‌یا ڤه‌شارتییه لایه‌ن و پارتێن سیاسی لکوردستانا باشۆر، ژبه‌ر خۆ سه‌پاندننێ و هه‌ڤرکییا سیاسیا دناڤبه‌را واندا، دارده‌ستییا وه‌ڵاتێن وه‌کو تورکییا و ئیرانێ و عێراقێ قه‌بۆلکرینه.
ئه‌وژی لدویف رویدان و کاودانێن بسه‌ر کوردستانا باشوردا هاتین و هه‌رگاڤ ڤان پارت و لایه‌نا ، بنه‌جهێن بریارا خۆ ، ئو ڕۆل و ئه‌رکێن خۆ دناڤبه‌را ڤان وه‌ڵاتاندا، پێگوهۆری پێ کرینه.
د ساڵێن نووتا و دشه‌رێ خۆ کوژییێ یێ پارتی دیموکراتی کوردستان و ئێکه‌تیا نیشتمانیا کوردستانێ دا، کو ژبلی بهه‌زران لاوێن ڤی وه‌ڵاتی قوربانی خۆ په‌رستی و قوربانی مانا خۆ کرن ، ئو یا ژوێ مه‌زنتر، په‌یداکرننا لهه‌ڤدوجودابوونێ و که‌رب کین و وێ دلماییا ئێخستییە دناڤبه‌را دوو ده‌ڤه‌رێن هەرێما کوردستانێدا کو لهه‌ڤدوو ناهێنه جوداکرن، و دوژمنێن کوردان نەکارینە وێ ئارمانجێ پێکبینن، بەلێ هەردوو لایەنێن دەسپێکێ بشەر و لدویڤدا بهەڤرکییا ئێک و دوو و بکردارێن خۆ، ئه‌و چه‌ند ئینا ڕۆژەڤێ و ئارمانجا دۆژمنا بجهئینا و هه‌تا ڕۆژا ئه‌ڤرۆ ملله‌تێ مه یێ باجا وێ چه‌ندێ دده‌ت، و ئەڤرۆ ئەو بویە مەترسی لسەر جودابوون، یان نەمانا قەوارا هەرێما کوردستانێ.
لساڵێن بوری و سه‌خمه‌راتی دابەشکرنا کوردستانا باشۆر ژهه‌می رویه‌کیڤه بۆ دوو ده‌ڤەران، و سه‌پاندنا هه‌ر لایه‌کی ژوان بۆ سیاسه‌تێن خۆ لوێ ده‌ڤه‌را ئەو لێ دەستهەڵادار، و ئەو چەند بۆ ئه‌گه‌را جیاوازیا هزری و کۆمه‌لایه‌تی و ماف و ئه‌رکان لهه‌ر ده‌ڤه‌ره‌کێ و جهێ داخێ بو کو هه‌ر ئێک ژوان لایه‌نا دبه‌رده‌وامبوون لسه‌ر هه‌مان سیاسه‌تێن خۆ ئو بهه‌می رێکاڤه ژبۆ ژده‌ستنه‌دانا هه‌یمه‌نه‌تا خۆ بسه‌ر وان ده‌ڤه‌رانڤه ئه‌وێن ئه‌و بیێت خۆ دزانن ژلایکیڤه، و ژ لایه‌کێدیڤه ژبو راگرتننا ته‌رازییا هێزاخۆ، دناڤبه‌را خۆ ئو نه‌یارێ خۆ یێ مێژوویی دا و ئەو دئامادەبوون هەرتشتەکی بکەن، و لداویێ ئەم گەهاندین ئەڤرۆیا کردستانێ، کو جارەنڤیسەک نەدیار لپێشییا وێ یە.
رێکه‌فتننا نه‌شەر و نە ئاشتی و پشککرنا دەستهەڵاتێ و داهاتی، کو وان برێکه‌فتنا ئیستراتیژی بناڤکر و وه‌کو هودنه‌یه‌کا درێژکری بو راوه‌ستاندن و دووباره‌نه‌کرنا شه‌ری دناڤبه‌راواندا، به‌لێ وێ چەند وەنەکر و نەبو رێگر کو هه‌ردوولا دبه‌رده‌وامبن ژبو به‌ده‌ستڤه ئینان و په‌یداکرننا پشتگیری و گرێدانا رێکەفتنێن به‌رزه و نه‌ئاشکرا دگه‌ل هێزین ئه‌قلیمی، ژبو رۆژێن پێتڤی پشته‌ڤانییێ.
هەلبەت ئه‌وچه‌ندژی لبه‌رامبه‌ر داهاتێن ڤی ملله‌تی یێن دراڤی و کانزایێن سوروشتی ژلایه‌کیڤه و ژلایه‌کێدیڤه لسه‌ر حسابا پرسێن نه‌ته‌وی و ژده‌ستدانا وان ماف و ده‌سکه‌فتێن ملله‌تێ مه ئه‌ڤه جه‌ندین ساڵن خه‌باتێ بۆ دکه‌ن، و ئەو رێکەفتن نها یێ دبنە ئاستەنگ لبەرامبەر گەهشتن بو رێکەفتنەکێ دگەل بەغدا.
په‌یوه‌ندییین پارتی دیموکراتی کوردستان دگه‌ک تورکیا و ئێکه‌تییا نیشتانییا کوردستانێ دگه‌ل ئیرانێ، ڤێ راستییێ ساغ دکەن و ئەگەرا به‌رده‌وامبوونا ڤی سه‌روبه‌رییە کو باشۆر تێدا، کو رۆژ بۆ رۆژێ به‌رێ ملله‌تێ مه دده بێ ئومێدییێ و دۆزا مە لباشۆر لجهێ ببەت پێش ، ژبۆ پاشڤە دبەت.
نها ئه‌رکێ چینا هۆشیار و رۆشەنبیر و زاناو کەسێن خودی زانست، دبوارێن جودادا دکومه‌ڵگه‌ها باشۆردا، بۆ رۆژا ئەڤرۆ ئه‌رکه‌ک مه‌زنه، و دڤێ بئه‌رکێ خۆ رابن، ژبو چارەسەرکرننا ڤی سه‌روبه‌ری، ئه‌وژی دپشکداریکرنێدا دژیانا سیاسی دا دگه‌ل ڕۆشه‌نبیرو ڕۆناکبیرێن چڤاکا کوردی، ژبو په‌یداکرنا هزرێن سیاسی یێن نوی و ره‌وشه‌نکرنا خه‌لکێ کوردستانێ ببنه‌مایێن دیموکرسییه‌تا راست و دروست و ژبو په‌یداکرنا فشاره‌ک جڤاکی ژبو راستڤه‌کرننا ئه‌ڤی سه‌روبه‌رێ مه‌یێ نها، کو ئێدی نه‌ما دهێتە قه‌بوولکرن.