هەڵبژاردن یان نوێکردنەوەی پەیمانی وەفاداری (المبایعە)?
هێمن ئەحمەد
2021-10-08 572
ئەوەی لەم وڵاتەدا دەگوزەرێت بەهیچ جۆرێک ناتوانرێت ناوبنرێت هەڵبژاردن.هەمان ئەو شێوازە گەوجاندنەیە کە ڕژێمی پێشو ناوی نابوو(المبایعە)،کە بریتی بوو لە نوێکردنەوەی پەیمانی وەفاداری بۆ ڕژێم و سەرکردە و دارودەستەکەی.بۆیە هەر چەند ساڵ جارێک هانی خەڵکیان دەدا بەوتنەوەی (نعم نعم للقائد....المبایعە للقائد)بڕژێنە سەر جادە و پاشانیش مێدیاکانیان ڕایاندەگەیاند کە زیاتر(لەسەدا نەوەد و پێنجی هاوڵاتیان بە بەڵێ پەیمانی وەفاداریان بۆ سەرۆک نوێکردۆتەوە).ئەوەی لەماوەی زیاتر لە سی ساڵی ڕابردو و تا ئەم ساتەش دەگوزەرێت هەمان شتە.بەڵکو دوبارە بونەوە و چەندجارە بونەوەی هەمان دۆخ و شێوازی حوکمڕانی پێشوە.بۆیە دەبینین دوای هەر پڕۆسەیەکی بەناو هەڵبژارن هیچ شتێک گۆڕانی بەسەردا نایات لە؛ئاستی گوزەرانی خەڵک و شێوازی فەرمانڕەوایی و دۆخی چەقبەستوی سیاسی و قۆرخکاری و گەندەڵی و نادادپەروەری و بەهەدەردان و تاڵان کردنی وڵات و دەست وەردانی حیزب لە هەموو کایەکانی ناو کۆمەڵگە و زوڵم و زۆری دەسەڵات دارە سەرمایە دارەکان.لەوەش سەیر و سەمەرە تر ئەوەیە،پێش ڕاگەیاندنی دوا ئەنجامەکان،هەر لایەنە و کورسی و دەسەڵاتی خۆی دیاری دەکات و دڵنیایی بە خۆیان و لایەنگرانیان دەدەن کە ئەنجامێکی باش بەدەست دێنن و دیسان لەپێشان سەرکەوتو تر دەبن.خۆ ئەگەر وڵات و خەڵکیان توشی کێشە و شکست ناهەمواری کردبێت،ئەوا هەر بەم نەفەسەی پێشانەوە بەبێ سڵەمینەوە هەمان بانگەشەو پڕوپاگەندە دەکەن و هەوڵ دەدەن هەست و سۆزی زۆرترین خەڵک بەلای خۆیاندا ڕابکێشن.زۆربەی ئەو کاندید و کەسایەتیانەی دیاریدەکرێن پاشان دەبنە خزمەتکار و گوێڕایەڵی پارتەکەیان نەک خزمەتکاری خەڵک.هەندێک جاریش دەبنە بازرگان و سەرمایەدار.گەر هەندێک جاریش لێرە و لەوێ کاندیدی نوێ و بەناو سەربەخۆ هەبن هەر زوو بەزوو دوای پڕۆسەکە گۆڕانکاری بەسەر دۆخ و بیرو ڕایاندا دێت و لەبەر بەرژەوەندی خۆیان تەک دەدەنە تەک لایەن و قەوارە بەهێزەکان.بۆیە تا ئێستا ئەوانەی بانگەشەی گۆڕانکاریان کردووە هەمیشە دۆخەکەیان خراپتر کردووە نەک باشتر.
گەر هەڵبژاردن ئەو پڕۆسە دیموکراسیە بێت کە ئەو هەل و مافە بۆ تاکەکانی گەل فەراهەم بکات(ئەوانەی مافی هەڵبژاردنیان هەیە) تا بتوانن بە خواستی خۆیان دەسەڵاتدار و فەرمانڕەواکانیان لەڕێگەی دەنگدانی ئازادەوە هەڵبژێرن،ئەی بۆچی لەم وڵاتەدا ئەم بەناو پڕۆسەی هەڵبژاردنە ناتوانێت هیچ گۆڕانکاریەک بەدی بهێنێت و تا ئێستا سوار هەر سوارە و ئامادەش نیە بۆ ساتێکیش پیادە بکرێت.ئاخر گەر هەڵبژاردن بکرێتە ئامرازی پاراستنی بەرژەوەندی پارت و لایەن و سەرمایەدارەکان و دەنگدانی خەڵکیش بکرێتە قەڵغانی بەرگری کردنی دەستکەوتەکانیان،ئیتر ئەمە چۆن ناو بنێین هەڵبژاردن!