نابێت "ژنبون"ی ئەو بەرێوەبەرە گشتییە بەكەم تەماشابكرێت، كە حكومەتی هەرێم-ی سەغڵەت كردوە
مەم بورهان قانع
2020-02-29 844
مێژوی مرۆڤایەتیی، خاوەنی سەدان و هەزاران ژنە، كە مێژو شانازییان پێوە دەكات. لە كایەی فیكر و فەلسەفەوە بیگرە، تا كایەی سیاسەت و لەوێیشەوە بۆ كایەی ئەكادیمیی و ئینجا بۆ بواری كارگێڕیی و پاشان دونیای زانست و هونەر و بوارە جیاجیاكانی ژیان بەگشتیی.
ژن، لەروی هەست و سۆزەوە، زۆر لە پێش پیاوەوەیە. لەروی وردبینییەوە، زۆر لەپێش پیاوەوەیە (بێگومان بەگشتیی قسە دەكەم). لەروی پەروەردەكردنی منداڵەوە، زۆر لەپیاو ماندوتر و لەپێشترە. لەروی كارگێڕییەوە، وردتر و بەسەلیقەترە.
بۆیە، پێمانوانەبێت ژن كارەكتەرێكی بچوكە و ئیدی پۆستێكی حكومیی، ئەگەر ژنێك بەرێوەیببات، پێمانوابێت جیاوازە لەهەمان پۆست، ئەگەر پیاوێك بەرێوەیببات.
پێمانوانەبێت، ئەگەر ژنێكی بەرێوەبەری گشتیی وەزارەتی دارایی عیراقیی، موچەی ئەم مانگەی موچەخۆرانی هەرێمی كوردستان-ی بۆ چەند رۆژێك و پاڵپشت بە داوایەكی ئەندامێكی دەستەی دەسپاكیی پەرلەمانی عیراقیی راگرتبێت، ئەوا وەكو كارەكتەرێكی بچوك تەماشای بكەین و بڵێین: "ژنێك حكومەتی هەرێم-ی سەغڵەت كردوە!"، بەڵكو ئەوە پۆستەكەیەتی (ژن بێت، یان پیاو) ئەم حكومەتە بێ پلان و ناشەفاف و نا ئیدارییەی هەرێمی سەغڵەت كردوە و بە بڕیاری بەرێوەبەرێكی گشتیی لە وەزارەتی دارایی عیراق (كە وەزیرەكەیشی كوردە)، بۆ زیاتر لە دە رۆژ موچەی زۆرینەی موچەخۆرانی هەرێمی كوردستان دوادەخات.
ئەم دواخستنی موچەیەی هەرێم لەلایەن بەرێوەبەرێكی گشتییەوە لە بەغداد (ژن بێت یان پیاو، جێگای باس نییە)، پێیوتین: چەندە حكومەتی هەرێم بێباكە لە وەڵامنەدانەوەی پرسیاری پەرلەمانتاران و داخوازیی خۆپیشاندەران، بە هەمان هێندەیش، بەرێوەبەرێكی گشتیی لە بەغداد، بێباكە لە نەناردنی موچەی موچەخۆرانی هەرێم و بەكەم تەماشاكردنی حكومڕانیی لە هەرێمی كوردستان.