پاڵنەروهۆکاری دەست پێشخەری ئاشتەوایی دەسەڵاتدارانی تورکیا بۆ کورد نهێنیەکی گەورە بوو. نهێنیەکی گەورەبوو بۆ هەموو لایەك و گرێیەکی نەکراوە بوو، بەتایبەتی بۆ رۆشنبیران و سیاسەتمەدارانی هەر چوارپارچەی کوردستان . هەموو پرسیاریان دەکرد و هەوڵی ووڵامدانەوەیان دەدا . هەندێ دەیان گەراندەوە بۆ ناچار بوونی ئەردۆغان بۆ بەدەستهێنانی دەنگی کورد لە گۆرانکاری یە چاوەروانکراوەکانی دەستوری ووڵاتی تورکیا تا تەمەنی سەرۆکایەتی بە دەستبڵاویەکی زۆرترەوە مسۆگەر بکات . هەندێکی تر دەیان گووت تورکیا دەزانێ بە بژاردەی سەربازی ناتوانێ ، بزوتنەوەی کوردی باکور لەبن بهێنێ و تەواوی بکات . هەندێ هۆکاری تریش لە ئارادابوو . بەڵام هەموو بە بێبروایی و گومانێکی زۆرەوە ، دەیانروانییە ئەو دەست پێشخەری یە  . 

رووداوەکان زۆر زوو رویان داو پاکێجێکی تەواو ئامادەکرا بوو بۆ رۆژهەڵاتی ناوێن بە بەتایبەتی لە سوریا ولوبنان و غەزەو یەمەن وعیراق و ئێران و ئوردن  ، هەر ووڵاتەو رۆڵی خۆی بۆ دیاری کرابوو لە گۆرەپانەکە . سەرەتا دەبوایە بەدیاری کراویی دەستی ئێران لە ناوچەکە ببردرێت .دوای ئەوە  لە غەزەوە دەست پێبکەن و خەڵکی غەزە لەو شارە دووربخەنەوە بۆ سینای میسری یان بۆ ئوردن. ئەویش لەبەر ئەوەی ئەو ناوچەیە دەبێتە رێرەوێکی نێودەوڵەتی بازرگانی جیهانی . لەگەڵ بنیات نانی گەورە پرۆژەی بنگۆریۆن ،کە دەخوازێ رێرەوێکی ئاوی نوێ بکاتەوە بۆ بەستنەوەی کەنداوی عەقەبە بە ئاوی دەریای سپی ناوراستەوە  .  بۆ ئەوەی ئەم پلانە وەك خۆرسك دەرکەوێ ، پێویستیان بە هاوکاری هەندێ سەرکردەی حەماس هەبوو تا چواردەوریان بگەیەننە ئەو بروایەی کە هێرش بکەنە سەر ئیسرائیل و ئۆپەراسیۆنێکی نەخشە بۆکێشراوو ئەنجام بدەن . لە حەوتی ئوکتۆبەر 2023 پلانەکەیان ئەنجام دا و لە یەکەم رۆژدا ،حەماس ئەنفالێکی بچوکی بەرێوەبرد، دژی مناڵ و ژن و خەلکی سڤیل . لە یەك کاتدا هێرشی کردە سەر شاری سیدۆرت و ئاهەنگێکی موزیکی لە شاری برعیم ، ، دواتر هێرشیان کردە سەر سێ بنکەی سەربازی وچەند بنکەیەکی پۆلیس  . ئیسرائیل پێویستی بەم رەشەکوژی یە هەبوو لە لایەن حەماسەوە ، تا دواتر دەستی بکرێتەوە و هەنگاو بۆ ئامانجەکانی خۆی بنێت .ئیسرائیل رەشەکوژییەکی زۆر گەورەتری ئەنجام دا لە غەزە دژی فەلەستینییەکان ، هەزاران خەڵکی سڤیلی کوشت بە مناڵ و ژن و پیریشەوە .بەڵام راستی یەکیش دەبێ بوەترێ کە چەکدارەکانی حەماس خۆیان لە پشتی خەڵکی سڤیل دەشاردەوە ،هەر بۆیە قوربانیەکان هێندە زۆربوون ، حەماس تەنانەت چەك وتەقەمەنی لە ژێر زەمینی نەخۆشخانەکان دەشاردەوە . بێجگە لەوەی حەماس لە جیاتی خەڵکی لە تونێلەکان بپارێزن ، کەچی خۆیان حەشار دەدا وخەڵکیان بە تەنها لەسەرەوە بەجێ دەهێشت .  لە دوای ئەوە روداوەکانی باشوری لوبنان دەستی پێکرد و هەنگاو دوای هەنگاو حزب الله ی بێهێزکرد و زۆربەی سەرکردەی ریزی یەکەم و دووهەمەکانیانی لەناوبرد .لە 8 دیسەمبەری 2024 هەیئەی تەحریر الشام بە سرۆکایەتی ئەبو محمد الجۆلانی ،( دیارە هەڵەیەکی گەورەی میدیای کوردی ئەوەیە بە ناوە نوێکەی ناوی بنێن لە کاتێکدا ئەو ناوە شەرعیەت دەدات بە گۆرانکاریەکی بنەرەتی لە کەسایەتی تیرۆرستێك  ) وگروپە توندرەوە ئیسلامیەکان دوای راکردنی بەشار ئەسەد دەستیان گرت بەسەر سوریادا ، خۆیان وەك دەسەڵاتێکی دیفاکۆ ناسان  . بە موبارەکی ورێخۆشکەری و پاڵپشتی تورکیا دوای ماوەیەکی کەم خۆی وەك سەرۆکی دەوڵەتی سوریای عەرەبی ناساند . ئەم روداوانە هەموو دارێژرابوون وپلانی تەواویان بۆ ئامادەکردبوو ، هەرچەند تورکیا پابەند نەبوو بە تەواوی پلانەکان بەڵام تا ئەو بەشەی کە ئەبو محمد جولانی ببێت بە سەرۆکی دەوڵەتی سوریا لەسەر خەت بوو . ئەم بەشەی دوایی ووڵامی دەستپێشخەریەکەی تورکیایە بۆ ئاشتەوایی لە گەڵ کورد . هەموو دەزانین کە تورکیا پاڵپشت ورێپیشاندەر وراوێژکاری سەرەکی ئەبو محمد جۆلانییە ئەوەش ئەوە دەگەیەنێت کە سوریا وەك ویلایەتێکی تورکیا ئەژمارد بکرێ . ئەم بە وولایەت  بونەی سوریا وادەکات تورکیا و ئیسرائیل بەریەکەوتەی راستەوخۆیان هەبێت . بەو پێ یەی تورکیا لە ئیستادا زیاتر لە 200 بنکەی سەربازی لە ناو سوریادا هەیە و دەیەوێ چەندین بنکەی گەورەی تریش لە داهاتودا بکاتەوە .وەك بنکەی سەربازی لە شاری تەدمور و سەحرا .کە لە چەند رۆژی رابردوو فرۆکە جەنگی یەکانی ئیسرائیل بە چری بۆردومانیان کرد ، لە ئێستادا ئەگەری پێکدادانی تورکیا وئیسرائیل زۆر نزیکترە لە هەر کاتێکی تر . لە ئەگەری پێکدادانی سەربازی نێوانیان ، تورکیا نایەوێت لە چەند بەرەیەکەوە شەری هەبێت بەتایبەتی ئەگەر ئیسرائیل چەکی پێشکەوتوو پێشکەشی کورد بکات ئەوە ، تورکیا توانای بەرەنگاربونەوەی دووسێ بەرەی پێکەوەی نابێت . هەر چەند تورکیا ژمارەی سەربازی زۆر تر بێت یان ژمارەی چەك و تفاقی زۆر تر بێت بەڵام لەبەر ئەوەی لە رووی ئیکۆنۆمییەوە لاوازە بەرگەی شەری درێژ خایەن ناگرێت .هەر بۆیە وەزیری دەرەوەی تورکیا دوای بۆردومانی بنکەی تەدمور بە خێرایی خۆی گەیاندە واشنتن تا نێوەندگیری بکات لە نێوانیان ، بەڵام هەموو دەزانین ئەمەریکا ئیسرائیل ناکاتە قوربانی تورکیای ئیستا کە سیستەمێکی ئیخوانی ئیسلامی لەسەر دەسەڵاتە . خوێندنەوەی تورکیا بۆ داهاتووی ناوچەکە و ئەگەری پێكدادان دووربینی پێووە دیاربوو ،  بەهەموو پێوەرەکان گومانی تورکیا لە گۆرانکارییەکان لە ناوچەکەدا لە رووی سەربازی وجیۆسیاسیەوە وایکرد کە دەستی ژەهراوی بۆ کورد درێژ بکات و بەدەستەکەی تریشیوە خەنجەرێكی لەوە ژەهراوی تری هەڵگرتبێت . هەر وەك چۆن پەندێکی پێشینان بەیانی کردوە و دەڵێ ـ هەر کاتێ تورك باسی ئاشتی کرد ،دڵنیابە شەرێك لە ئارادایەــ . دەسەڵاتدارانی تورکیا بەرامبەر کورد شەری مان ونەمان دەکەن و دەزانن بوونی کورد وەك کیانێك واتای نەمانی رەسی تورکە و ئەو رۆژەش زۆر نزیك بۆتەوە .