ئەمڕۆ وەزیری دەرەوەی توركیا لەگەڵ سەرۆكی بەرەی توركمانی عێراقی لە ئەنقەرە كۆبوویەوە، لە كۆبوونەوەكەدا تاوتوێی چەند پرسێكی هاوبەشیان كرد، ئەمە لە كاتێكدایە، توركیا دەیەوێت لە ڕێگەی بەرەی توركمانی عێراق و حزبەكانی هاوپەیمانیەوە ئامانجەكانی بەدەست بهێنێت.
ئاوێنە: بەرەی توركمانی عێراق لەبارەی كۆبوونەوەی ئەمڕۆی حەسەن توران سەرۆكی بەرەی توركمانی عێراقی لەگەڵ هاكان فیدان وەزیری دەرەوەی توركیا ڕاگەیاندراوێكی بڵاوكردەوە.
لە ڕاگەیاندراوەكەدا هاتووە، ئەمڕۆ هاكان فیدان لەگەڵ حەسەن توران لە ئەنقەرە كۆبوویەوە، لە كۆبوونەوەكەدا تاوتوێی پەیوەندییە دووقۆڵییەكانی نێوان هەردوولا، هەروەها تاوتوێی هاوكاری و كار هاوبەش كرا بۆ بەدیهێنانی بەرژەوەندییەكانی هەردوولا.
ئەمە لە كاتێكدایە، توركیا دەیەوێت لە ڕێگەی بەرەی توركمانی عێراق و حزبەكانی هاوپەیمانیەوە ئامانجەكانی لە هەرێم و عێراق بەدەست بهێنێت، هەروەها ئامانجی كۆبوونەوەكە دانانی پلانی دوای هەڵبژاردنی ئەنجوومەنی پارێزگاكانی عێراقە.
جێگەی ئاماژەیە، بەرەی توركمانی عێراق لە كەركووك تا ئێستا بڕیاری نەداوە هاوپەیمانی لەگەڵ چی حزب و لایەنێك ببەستێت بۆ پێكهێنانی حكومەتی خۆجێی و دیاریكردنی پارێزگارێكی نوێ بۆ كەركووك، هەروەها سەردانی حەسەن تورانیش بۆ توركیا هەر بۆ ئەم مەبەستە بووە.